Benvida do decano


Benvido/a á Facultade de Dereito da Universidade da Coruña!

A nosa Facultade comezou a súa andaina en 1987 e na actualidade ofrece un amplo catálogo de titulacións nacionais e internacionais de Grao e Mestrado, dous programas de doutoramento e diversos títulos propios e cursos de formación continuada.

Aquí poderás adquirir un coñecemento global das normas e institucións xurídicas e a capacitación inicial para a análise crítica da realidade e o exercicio profesional, e recibirás unha formación teórica e práctica que combina a dimensión académica dos profesores coa dimensión profesional dos representantes das principais actividades xurídicas.

Atoparás unha Facultade vinculada á sociedade coruñesa e galega con programas de prácticas externas e colaboracións con empresas, institucións e colexios profesionais, e unha Facultade con perfil internacional, con programas de intercambio e estadías de estudantes e persoal docente e investigador e a posibilidade de desenvolveres os teus estudos no Grao en Dereito bilingüe, no Duplo Grao coa South Wales University ou na Dupla titulación de Mestrado en asesoramento xurídico empresarial e LLM in Corporate Law & Finance coa Widener University (EE.UU.).

Convencido do acerto da túa escolla, deséxoche unha enriquecedora etapa persoal e profesional na Facultade de Dereito da UDC.

José Antonio Seoane Rodríguez

Decano